Proteinski Low Carb kolač sa sirom i malinama. Može li da se zasladimo bez griže savjesti? Čizkejk bez ugljenihhidrata? Može! Može li bez industrijskih slatkiša, bez šećera i brašna? Kod mene može. A, sada imaš recept pa može i kod tebe 🙂.
Na blogu već imate recept za Cheese cake sa kokosom i maskarpone sirom. Ovoga puta mi se jelo nešto slično, a opet različito. Iako se ne javljam i ne pišem često moj duh za eksperimentisanjem i isprobavanjem novih recepata ne jenjava.
Znam, znam obećanja i neispisani recepti se gomilaju, i trebalo je sada da pišem recept za tortu sa makom i jagodama, ali izgleda sam zagubila bilješke recepta. Šta da se radi, eto i to se meni desi.
Ovaj proteinski Low Carb kolač sa sirom i malinama sam pravila u formi prečnika 28 cm. Nesvojstveno meni, znam ali imala sam goste i htjela sam ugoditi svima. Stoga sam se i za zaslađivač odlučila koristiti brezin šećer/ksillit jer on najvjernije mijenja šećer. Naravno, vi možete koristiti i eritritol.
U poslednje vrijeme nekako mi je teško ugoditi svima. Njima neslatko, meni preslatko – vječita boljka. Međutim, sa ovim kolačom/čizkejkom od sira svima će da bude potaman. Dokazano. :-).
Završio se i tromjesečni program kod dr Marije, sa profila Zdravo jedi. I tu bih vam imala pisati novostečena iskustva i otkrića, sam napredak. No, ne da mi se. Želim vam što prije podijeliti recept kako biste ga mogli spremiti i uživati i vi.
Počela sam da čitam knjigu o emotivnom prejedanju, izbacivanju industrijskog šećera i ženi koja je već četrnaest godina “ona bez šećera”.
Danas sam negdje pročitala pitanje: “Ima li ko iskustva sa emotivnim prejedanjem?”
Pitam se koji je procenat onih koji nemaju to iskustvo. Moj savjet – onako brzinski bi bio: naučite da prepoznate emociju. Razdvojite emociju od gladi. Napravite zdrav slatkiš, pa kada vas ipak savlada ta emocija (ne glad) zadovoljite je mudro, da bar nemate grižu savjesti. Pripremite se za bitku sa samim sobom.
Nabacah svega, to su više kao teze o čemu bih voljela da vam pišem. Više o svemu tome drugi put.
Proteinski Low Carb kolač sa sirom i malinama je jako sit, a ja sam ga servirala uz još svježih malina i drugog bobičastog voća, tako da mi je bukvalno pozamašno parče ovog kolača zamijenilo obrok.
Recept – Proteinski Low Carb kolač sa sirom i malinama
Proteinski Low Carb kolač sa sirom i malinama možete praviti sa koricom ili bez nje. Ja sam se ovaj put odlučila za koricu, savršeno se uklopila, nisam se pokajala.
POTREBNO
Za koricu:
- 300 gr mljevenog blanširanog badema (ili nekog drugog koštuničavog voća ili pak kombinacija sa kokos brašnom)
- 80 gr butera sobne temperature
- 1 manje jaje
- 50 gr mljevenog brezinog šećera/ksilita
Za fil:
- 800 gr krem sira/ricotta sira (ili drugog po izboru)
- 5 jaja
- 150 gr brezinog šećera/ksilita (dodatno usitniti u mlinu za kafu)
- 100 gr whey proteina (kod mene čisti protein sirutke – ništa drugo nema u sastavu)
- 1/2 praška za pecivo
- aroma vanile (ili sadržaj jedne maune vanile)
- 200 gr malina (svježih ili odleđenih)
PRIPREMA
- Formu prečnika 28 cm obložiti papirom za pečenje.
- Zagrijati rernu na 160 stepeni.
- Pomiješati sastojke za koricu i utapkati u formu.
- Za fil, umutiti jaja sa zaslađivačem a zatim dodati sir i ostale sastojke. Poneku malinu ostaviti i poredati na vrh kolača.
- Sipati fil preko korice. Rasporediti preostale maline.
- Peći kolač 60 – 70 minuta, paziti da ne izgori. Zatim iskuljučiti rernu, odškrinuti vrata rerne i ostaviti kolač da se ohladi u rerni.
- Kolač služiti hladan. Po želji poslužiti sa još malina, ili drugog bobičastog voća, koje ste prethodno izgniječili.
