Supa od luka je iznenađujuće ukusna i prijatno mirisna čorbica, koja će okrijepiti vaša čula. Poznata supa u francuskoj kuhinji, koja se pravi i dan danas. Idealna za hladne i zimske dane, ali i za naš imunitet.
Ne kaže se uzalud da vrijeme čini svoje. Nikada mi kao klinki ne bi palo na pamet da napravim, pa ni da probam. Čuj – supa od luka!
Listam tako časopise sa hranom, i upravo mi ova supa zapala za oči. Fina neka fotka i ne registrujem luk, nego mi se čini miriše i preko fotografije. Izgleda lijepo. A, meni hladno. Razmišljam – baš bi divno prijala vruća supica u zimske i hladne dane.
Idu nam i praznici, slavilo nam se ili ne. Sigurno je da moramo da jedemo. Trpeza nam ne mora biti ni raskošna ni skupa. Bitno je da smo zdravi i da smo zajedno.
U glavi već imam ideje. Nižu se kao vezice, samo da odemo, praviću i ovo i ono. Ovaj put ne mislim kao do sada. Ovaj put pojednostavljujem. Planiram sve laganije. Planiram da pečem sa mojim prirodim starterom.
Svaka nova godina i Božić se slavi kod kuće. Ovoga puta to “kod kuće” tako je neizvjesno da već sada svaku noć liježem i vrpoljim se. Zaspim i budim se. Uvijek sa istim strahom. Da li će? Kako li će? Kada li će?
Strpljiva nikad nisam bila. Iako me život iznova i iznova uči da budem.
Ova godina 2020 -ta ušila je sve. Nije još vrijeme da je ispraćam, a tako sam nestrpljiva. Ušli u decebar, dajem sebi pravo da polako počnem da je okaljavam i sumiram.
Pa u to ime može i ova supa od luka. Brza je i jednostavna za pripremu, jeftina, a prije svega mirisna i ukusna. Ugrijaće nas u zimske dane.
Supu od luka pravila sam prvi put u životu ove godine. Veliki problem stvarala mi je i sama pomisao na sjeckanje luka i plakanje zbog istog. Ukoliko nemate neke druge ruke i oči koje će se žrtvovati za vas :-), nadam se da imate neku mašinu. Za mene je, ovaj put, luk isjeckao kenwood. Inače, muž pritrči u pomoć. Sada su mi pali na pamet i “Saveti usred srede” – i sjeckanje luka bez suza – koje piše Tanja Leković. Možete je potražiti na instagramu.
Međutim, supa od luka od sada će redovno biti na našem jelovniku. Riječ je, zapravo, o pravoj francuskoj supi. Ko još sumnja u francusku kuhinju, potpisala bih sutra da živim tamo :-).
A Francuzi ovu supu serviraju uz prepečeni hljeb i sir, kod mene primjer parmezana. Na fotografijama čips od parmezana. Francuzi još vjeruju da ova supa pomaže protiv mamurluka. Ja vjerujem Maurice Messege-u, francuskom kralju biljaka. A on je vjerovao i pisao o nevjerovatnim i ljekovitim moćima luka. Po njemu, luk se, u pogledu zdravlja, smatra najkorisnijim povrćem.
Stoga mislim da je jedna glavica luka, koju tu i tamo, prodinstam za ručak, stvarno zanemarljiva. I s vremena na vrijeme treba nadoknaditi te propuštene količine :-).
Recept – Supa od luka
Supa od luka može biti i potpuno posna. Izbacite buter i koristite bujon od povrća. Jednostavna i brza, sa sve pripremom biće gotova za pola sata. Ukoliko ne želite koristiti bijelo vino, izostavite ga, a umjesto njega ukapajte limunovog soka.
POTREBNO
- 500 gr crvenog luka
- 3 čena bijelog luka
- 3 kašike maslinovog ulja
- kockica butera – 20 gr
- 100 ml bijelog vina
- 500 ml povrtni ili pileći bujon
- list lovora
- so, biber, kurkuma
PRIPREMA
- Oguliti i isjeći luk, crveni i bijeli.
- Zagrijati u tiganju maslinovo ulje i otopiti buter.
- Dodati isjeckan luk, posobliti, pobiberiti. Začiniti sa kurkumom po želji. I dinstati tako 10 – 15 minuta. Uz stalno i pažljivo miješanje.
- Luk treba da požuti nikako da zagori i da se raspane.
- Zatim dospite vino i bujona do željene gustine.
- Dodajte list lovora.
- Krčajte na laganoj vatri sve zajedno još 10 – 15 minuta.
- Probajte i eventualno još posolite.
- Služite toplo. Uz tostiran hljeb i sir.
- Prijatno.
